Монголын Бизнесийн Зөвлөл

Төлөөлөн Удирдах Зөвлөл

2007 оны 9 сард Монгол улсад бизнесийн үйл ажиллагаа хэрэгжүүлж байгаа тодорхой тооны төлөөлөл уулзан ярилцаж улмаар Монголын Бизнесийн Зөвлөлийг байгуулсан билээ. Манай Төлөөлөн Удирдах Зөвлөлийн гишүүд Монгол орны бизнес, эдийн засгийн чухал тулгуур болох салбаруудын төлөөллөөс бүрддэг. 2008 оны 3 сарын ТУЗ-ийн хурлаар шинээр 7 гишүүдийг нэмж оролцуулан ТУЗ-н гишүүдийн нийт тоо 15 болон тодорхойлогдсон. Үүсгэн байгуулагч 8 гишүүн бүхий ТУЗ-ын Гүйцэтгэх Хороо үйл ажиллагааг хангаж ажилладаг.

Лоренц Мелчерс, Монголиан Стар Мелчерс - Дарга
Лоренц Мелчерс Монголиан Стар Мелчерс компанийн үүсгэн байгуулагчдын нэг билээ. Тэрээр өөрийн гэр бүлийн хамт 1997 оноос хойш Монгол Улсад оршин сууж байгаа. Массачусетийн Их Сургуулийн бакалавр зэрэгтэй.

МСМ бизнесийн 4 салбарт үйл ажиллагаа явуулдаг худалдаа, үйлчилгээний компани юм. Үүнд: Уул уурхай & Барилгын материал, Автомашины худалдаа & үйлчилгээ, Өргөн хэрэглээний барааны нийлүүлэлт, Эрүүл мэнд & эмнэлэгийн материал. МСМ чанартай үйлчилгээ, бүтээгдэхүүнээрээ олны танил бөгөөд Мерседес Бенз (суудлын тэрэг, ачааны машин), Мицубиши Моторс, Атлас Копко (үүсгүүр, шахалтын тоног төхөөрөмж), Боарт Лонгйер (өрмийн эд анги), Жонсон&Жонсон, Кимберли Кларк тэм дэлхийн нэр хүндтэй олон компаниудынн Монгол дахь төлөөлөгч юм.



Лувсандэндэвийн Сумати, Сант Марал Сан - Дэд Дарга
Лувсандэндэвийн Сумати 1994 оноос хойш Сант Марал Сангийн Гүйцэтгэх Захирлаар ажиллаж байна. Тэрээр мөн Transparency International Mongolia байгууллагын дарга бөгөөд Монголын Урлагийн Зөвлөлийн Төлөөлөн Удирдах Зөвлөлийн гишүүн юм. 1979 онд ЗХУ-д Москва хотын Улсын Их Сургуулийг Математикийн (Информатик) дипломтой төгссөн. Мөн Мичиганы Их Сургуулийн Нийгмийн Судалгааны Институтийн зуны сургалтанд хамрагдаж, Варшав хотноо Польшийн Шинжлэх Ухааны Академийн Компьютерийн шинжлэх ухааны институтэд судалгааны ажил хийж байсан.

Иргэдийн эрх ашгийн төлөө, өөрөө удирдах, ашгийн бус төрийн бус байгууллага “Сант Марал” Сан нь 1994 оны 9 дүгээр сард байгуулагдсан. Эрх чөлөө, шударга ёс, ардчиллын үндсэн зарчим дээр тулгуурласан нийгмийг бүтээхийн төлөө Монголын нийгмийн хөгжилд хувь нэмэр оруулах үндсэн зорилготой.

Суматигийн удирдлаган дор Сант Марал Сан олон тооны санал асуулга, зах зээл болон  судалгааны төслүүдийг хэрэгжүүлсэн билээ. ХБНГУ-ын Конрад Аденауэрийн Сан 15 жилийн турш тус сангийн улс төрийн судалгааны ажлыг санхүүжүүлсээр ирсэн. Сант Марал Сангийн үйлчлүүлэгчдээс дурьдвал: Улс төрийн намууд, Хаан Банк, Дэлхийн Банк, Европын Сэргээн Босголт Хөгжлийн Банк, Азийн Сан, Германы Техникийн Хамтын Ажиллагааны Нийгэмлэг, Мицуи, Катерпилар зэрэг олон төрлийн байгууллага болно.


Ж. Питер Морроу, Хаан Банк – Үүсгэн байгуулагч дарга
Питер 2000 оноос хойш Хаан Банкны гүйцэтгэх захиралаар ажиллаж, Монгол улсад амьдарч байна. Тэрээр 38 жилийн турш АНУ болон хуучин социалист орнуудад банкны салбарт ажиллаж, санхүүгийн зөвлөх байсан. Тэрээр мөн ХАМБЗ, Монголын Урлагийн зөвлөлийн дэд тэргүүн бөгөөд өөр олон компани, ТББ-уудын удирдах зөвлөлд багтдаг.

Хаан Банк Монголын бүх аймаг, суманд нийт 470 орчим салбартай Монголын тэргүүлэгч банк бөгөөд байгууллага, уул уурхайн компаниудад зориулсан цогц үйлчилгээ үзүүлдэг. Гадаадын хөрөнгө оруулалтын эзэмшил бүхий менежменттэй олон улсын шилдэг туршлага арга барилыг мөрдөж ажилладаг.


Д. Хулан, Таван Богд
Д. Хулан өөрийн гэр бүлийн хүн болох Ц. Баатарсайхантай хамтран үүсгэн байгуулсан Таван Богд Группын дэд ерөнхийлөгч юм. Тэрээр өмнө нь Худалдаа Хөгжлийн Банкны дэд ерөнхийлөгчөөр ажиллаж байсан ба Токио дахь “Говь” компанийн төлөөлөгч компанийн худалдааны менежерээр ажиллаж байсан. Москвагийн Санхүүгийн Их Сургуулийг олон улсын эдийн засагч мэргэжлээр төгссөн, Монгол Улсын Их Сургуулийн бизнесийн удирдлагын мастер зэрэгтэй.

Таван Богд Групп нь олон салбарт үйл ажиллагаа явуулдаг: боловсруулах үйлдвэрлэл (хүчин чадлын хувьд хамгийн том гурилын үйлдвэртэй), худалдаа&үйлчилгээ (Фужи Филм Фото, Ксерокс, Волксваген), өргөн хэрэглээний бараа (Нестле, Хайнз, Колгейт, Палмолив-н хүнс, гэр ахуйн бараа), аялал жуулчлал (Кемпински Хаан Палас, Жуулчин Травел) болон үл хөдлөх хөрөнгийн үйлчилгээ үзүүлдэг.

Б. Болд, Ньюком Групп
Б.Болд 2009 оны 11 сараас Ньюком компанийн Гүйцэтгэх захирлаар ажиллаж байна.
Б.Болд нь  JPMorgan компаний Хөрөнгө оруулалтын банкны  ОХУ, Тусгаар улсуудын хамтын нөхөрлөлийн гишүүн орнууд болон Монгол улсыг хариуцсан Гүйцэтгэх захирлын албан тушаал хашиж байсан, хөрөнгө оруулалтын банкинд 11 жил ажилласан туршлагатай.

Б.Болд нь 1998 оноос Нью-Йорк дахь JPMorgan компанид ажиллахдаа IPO, LBO, M&A чиглэлээр Blackstone, Warburg Pincus, KKR, Apollo зэрэг АНУ-ын тэргүүлэх компаниудад санхүүгийн зөвлөлгөө өгч туршлага хуримтлуулсан билээ.  Тэрээр АНУ, Европ болон Азид нийтдээ 30 гаруй хэлцэл амжилттай хийж гүйцэтгэсэн байна.

Ньюком компани нь нийт 1000 гаруй ажиллагсадтай, нийтэд Ньюком Групп гэж нэрлэгддэг охин болон хараат компаниудыг багтаасан хөрөнгө оруулалтын компани юм. 1993 онд байгуулагдсан бөгөөд Монгол улсын томоохон компаниудын нэг юм. Ньюком компани нь харилцаа холбоо, жижиглэнгийн худалдаа, санхүүгийн үйлчилгээ, мэдээллийн технологи, үл хөдлөх хөрөнгө, дотоодын иргэний агаарын тээврийн салбаруудад хөрөнгө оруулалт хийж байна.

Даг Грахам, Бороо Гоулд
Даг Бороо Голд компанийн Санхүү Захиргаа хариуцсан захирал бөгөөд  2006 оноос хойш гэр бүлийн хамт Монголд суурьшин ажиллаж амьдарч байна. Тэрээр өмнө нь PWC компанид Эрсдлийн менежмент болон Ашигт ажиллагааг сайжруулахад чиглэсэн Захиргааны Зөвлөхөөр ажиллаж байсан.Даг Летбрижийн Их сургуулийн Захиргаа удирдлагын бакалавр зэрэгтэй бөгөөд бөгөөд мэргэшсэн удирдлагын нягтлан бодох бүртгэлийн гэрчилгээтэй.

Бороо Голд компани нь Сентерра Голд компанийн салбар. Сентерра нь хөгжлийн чиг хандлага бүхий Канадад төвтэй алтны уурхай, хайгуулын компани бөгөөд Төв Ази, хуучин ЗХУ-ын бүрэлдэхүүний орнууд болон бусад дэлхийн шинэ тулгар зах зээлийн орнуудад алттай холбоотой худалдаа, нөөц, хайгуул, хөгжлийн бодлого болон хэрэгжүүлэлттэй холбоотой үйл ажиллагаа явуулж байна.

Т. Амарзул, Петро Матад
Амарзул Сингапурт  боловсрол эзэмшиж Монгол улсын засгийн газрын хэрэгжүүлэгч агентлаг Гадаадын Хөрөнгө Оруулалт Гадаад Худалдааны Агентлагт ажиллаж байгаад Монголын эрдэс баялагийн салбарт шилжин энэ салбарын хувийн хэвшлийн байгууллагуудад удирдан зохион байгуулах ажил үүрэг гүйцэтгэж байсан.

Амарзул Петро Матад ХХК-ийн Гүйцэтгэх захирал бөгөөд тус компани нь Монгол Улсын Засгийн газартай бүтээгдэхүүн хуваах гэрээ байгуулсан Монголын зүүн хязгаарт орших газрын тосны ХХ ордод газрын тосны хайгуул хийх эрх бүхий анхны монгол компани юм.



М. Баярбахдал, QGX Group
Баярбахдал 1994 онд хайгуулын лиценз авсан анхны барууны компани болох QGX Монголын Гүйцэтгэх захиралаар ажиллаж байна. Тэрээр QGX Монголд ажиллахаасаа өмнө Монголын үүрэн телефоны 2 дахь том оператор болох Юнител корпорацийн Үйл ажиллагаа эрхэлсэн захиралаар ажиллахдаа маркетинг, борлуулалтын багийг өмнөө тавьсан зорилгодоо хүрэх ажлыг нь удирдан явуулдаг байсан. Баярбахдал Нью Йоркын Улсын Их Сургуулийн Бизнесийн Удирдлагын мастер зэрэгтэй.
1994 оноос QGX Монгол хайгуулын хөтөлбөрүүдийг эрчимтэй явуулж олон эрдэс баялагийн орд нээсэн билээ. Үүний үр дүнд, өнөөгийн байдлаар QGX Монгол гурван уул уурхайн лицензтэй бөгөөд үүнээс Баруун Наран дахь төмрийн болон дулааны нүүрсний өмч нь Өмнө Говь дахь хамгийн дэвшилттэй төсөл юм. Нийгмийн болон байгаль орчны хариуцлага хэрэгжүүлэгч компанийн хувьд QGX Монгол нь нийгэм, байгаль орчинд ээлтэй, аюулгүй байдлыг үйл ажиллагааныхаа тэргүүний чиг болгож ажиллаж байгаа нь Монгол дахь хайгуул, уул уурхайн олон компаниудад үлгэр жишээ компани болгоход хүргэсэн.

Крис Кован, Эрдэнэ Ресорсез Девелопмент Корп
Крис Кован Монгол улсад 2002 оноос хойш ашигт малтмалын олборлолт хийж буй Канадад төвтэй  Эрдэнэ Ресорсез Девелопмент Корпийн дэд ерөнхийлөгч, захирал бөгөөд үүсгэн байгуулагчдын нэг юм. Эрдэнэ одоогийн байдлаар Говийн баруун өмнөд хэсэгт молибден/нүүрсний уурхай, ИксТрата Коалтай хамтарсан гэрээний хүрээнд Монгол оронд нүүрсний олборлолт явуулсаар байна.
Крис Кован 1990д оноос хойш дэлхийд уул уурхайн компаниудад ашигт малтмалын зөвлөхөөр ажилласаар ирсэн. Крис өмнө нь 28 жил Фалконбридж Лимитед-д олборлолт, үйлдвэрлэл хариуцсан удирдах дээд албан тушаал хашиж байснаас гадна Юнайтед Кено Хилл Майнз-ын ерөнхийлөгч, Индусмин компанийн даргаар ажиллаж байсан.
Крис Геологийн мастер зэрэгтэй. Тэрээр анх 1997 он Монголд ирсэн.



Б. Чулуунбаатар, Моннис Интернэшнл
Б. Чулуунбаатар Моннис Интернэшнл ХХК-г 1998 онд үүсгэн байгуулсан бөгөөд Ерөнхийлөгч & Гүйцэтгэх Захирлын албан тушаалыг хашиж байна. Өнөөдрийн байдлаар Моннис компани үйл ажиллагаагаа олон салбарт өргөжүүлж автомашины худалдаа, засвар үйлчилгээ (Ниссан Моторс-н албан ёсны дистрибьютер), уул уурхай (2002 оноос хойш Liebherr Групп, 2007 оноос хойш Terex Компанийн албан ёсны дистрибьютер), барилга (Bomag Группын албан ёсны дистрибьютер), эрчим хүч, гадаад худалдаа, харилцаа холбоо, даатгал болон агаарын тээврийн чиглэлийн 7 охин компанитай болсон бөгөөд нийт 500 гаруй ажилтан, албан хаагчидтайгаар үйл ажиллагаагаа амжилттай хэрэгжүүлж байна. 

Ж. Од, Эм Си Эс Групп
Ж. Од ЭмСиЭс Группын ерөнхийлөгч бөгөөд тэрээр өмнө нь Вашингтон дахь Монгол улсын элчин сайдын яаманд Нэгдүгээр нарийн бичгийн дарга, Монгол улсын ерөнхий сайдын гадаад бодлогын зөвлөхөөр ажиллаж байсан. ОХУ-н Москва хотын Олон Улсын Харилцааны Институт, Оксфордын Их Сургуулийн Гадаад Харилцааны Институтийг тус тус дүүргэсэн. Ж.Од мөн Дани улсын өргөмжит консулын үүрэг хариуцлагыг хүлээдэг.

ЭмСиЭс Групп 1993 онд эрчим хүчний салбар дахь Монголын анхны хувийн хэвшлийн компани болж байгуулагдаж байсан. ЭмСиЭс компани эрчим хүч & дэд бүтэц, мэдээлэл & харилцаа холбооны технологи, ундааны үйлдвэрлэл & борлуулалт, бөөний болон жижиглэнгийн худалдаа, үл хөдлөх хөрөнгө, барилга, хэвлэл зэрэг бизнесийн олон салбарт үйл ажиллагаагаа амжилттай өргөжүүлэн тэлж байна. ЭмСиЭс Групп нийт 3100 гаруй ажилчидтай  бөгөөд сүүлийн жилүүдэд тогтмол “Шилдэг 5 татвар төлөгчдийн” нэгээр шалгарч байна.

Б. Энхбат, Жаст Групп
Энхбат 2007 оноос хойш Жаст Группын Үйл ажиллагаа эрхэлсэн захиралаар ажиллаж байна. Тэрээр өмнө нь Монгол Даатгал компанийн гүйцэтгэх захиралаар ажиллаж байжээ. Энхбат Австралийн улсын их сургуулийн бизнесийн удирлагын мастер зэрэгтэй бөгөөд менежментийн хэд хэдэн сургалтанд хамрагдсан юм.

Анх 1999 онд гадаад, дотоод худалдааны чиглэлээр үүсэн байгуулагдаж байсан Жаст групп нь эдүгээ газрын тосны бүтээгдэхүүний импорт, уул уурхай, хөдөө аж ахуй, барилга, худалдаа үйлчилгээний салбарт нийт 630 гаруй ажиллагсадтайгаар үйл ажиллагаагаа явуулж байна.

Лэйтон Крофт, Айвенхоу Майнз/Оюу Толгой
Лэйтон Айвенхоу Майнз Монгол, Оюу Толгой төслийн  компанийн олон нийтийн  харилцаа&нийгмийн хариуцлагын газрын дэд захирлаар ажиллалаг. Тэрээр Оюу Толгой төслийн гадаад харилцаа, тогтвортой хөгжлийн ажлыг орон нутаг, бүс нутаг, улс орны хэмжээнд хариуцан ажилладаг. 1994 онд анх Монгол ирснээсээ хойш 10 гаруй жил хот, хөдөө ажиллаж, амьдарч байна.

ХАМБЗ, Уул Уурхай Ашигт Малтмалыг Хөгжүүлэх Сан, Монголын Үндэсний Уул Уурхайн Ассоциаци, ДОХ-н тэмцэх үндэсний сан, Боловсролын зөвлөгөө, мэдээллийн төв, Монгол Урлагийн Зөвлөл, Giant Steppes of Jazz, Америкийн Монгол Судлалын Төв, Улаанбаатарын Олон Улсын Сургууль зэрэг Монгол улсын тогтвортой эдийн засгийн өсөлт, нийгмийн хөгжлийг дээшлүүлэх зорилготой ашгийн бус байгууллагуудын удирдах зөвлөлийн гишүүн юм.

Б. Нямтайшир, Монголын Алт Корпораци
Нямтайшир Монголын Алт Корпорацийн Төлөөлөн Удирдах Зөвлөлийн Дарга бөгөөд Ерөнхийлөгч. Тэрээр өмнө нь Үндэсний Аюулгүй байдлын Ерөнхий газар, Шинжлэх Ухаан Технологийн Их Сургууль, Засгийн Газрын Барилга угсралтын компанийн Гадаад Эдийн Засгийн хамтын ажиллагааны газарт ажиллаж байсан бөгөөд ОХУ-ын Санкт Петербургийн Уул Уурхайн дээд сургуулийг төгссөн.

Нямтайшир 1993 онд Монголын Алт Компанийг үүсгэн байгуулсан бөгөөд одоо тус компани монгол улсын хэмжээнд 70 гаруй үнэт болон үнэт бус металл, нүүрс, газрын тос барилгын материал, ашигт малтмалын уул уурхайн болон хайгуулын лиценз эзэмшиж үүгээрээ үндэсний хэмжээнд хамгийн олон талт уул уурхайн үйл ажиллагаа хэрэгжүүлэгч байгууллага болж чадсан юм.

Рандолф С. Коппа, Худалдаа, Хөгжлийн Банк
Ноён Рандолф С. Коппа нь Худалдаа, хөгжлийн банкны ерөнхийлөгчөөр ажилладаг ба тэрээр анх Монгол улсад 2004 онд ING банкны ХХБ-тай байгуулсан техникийн туслалцааны гэрээний хүрээнд ирж ажиллаж эхэлжээ.

Р.Коппа нь мөн Монголын Ипотекийн Корпораци (МИК)-ийн Төлөөлөн удирдах зөвлөлийн дарга, Монголын Бизнесийн Зөвлөл болон ADFIAP-ийн ТУЗ-ийн гишүүний үүрэгт албыг тус тус хашиж байна. Сүүлийн 43 жилийн хугацаанд гадны олон улс, орны банк санхүүгийн салбарт ажиллаж байснаас Монгол улс нь түүний ажиллаж буй 12 дахь орон юм. Тэрээр Висконсиний Их Сургуулийг Гадаад харилцааны чиглэлээр дүүргэжээ.

Худалдаа, хөгжлийн банк нь Монголын ууган арилжааны банкуудын нэг бөгөөд байгууллагын зээл, худалдааны санхүүжилт, гадаад төлбөр тооцоо болон валют арилжаа зэрэг үйлчилгээгээрээ салбартаа тэргүүлэгч байсаар ирлээ. Мөн түүнчлэн, ХХБ банк нь Монголчууддаа карт, интернет болон SMS banking зэрэг хувийн банкны үйлчилгээгээ чанарын өндөр түвшинд үзүүлсээр байна. ХХБ-ны зах зээлд тэргүүлж буй амжилтуудыг үнэлэн “The Banker” сэтгүүлээс “Монгол улсын шилдэг банк” шагналыг 2 удаа, Монгол улсын Засгийн газар болон бусад гадаад дотоодын байгууллагуудаас “Монгол улсын тэргүүлэгч банк”, “Нийгмийн хариуцлагыг хэрэгжүүлэгч байгууллага”, “Шилдэг татвар төлөгч”, “VISA International” байгууллагын нэрэмжит шагнал зэрэг шагналуудыг хүртлээ.