Source: News.mn                   Date: 23 July, 2010

Товлосон хугацаанаасаа зургаа, тогтсон уламжлалаасаа арав хоногоор хождож, УИХ-ын хаврын чуулганыг өндөрлүүллээ.

УИХ-ын дарга чуулганыг өндөрлүүлж хэлсэн үгэндээ хаврын чуулганаар нийт 130 орчим хууль, тогтоолын төсөл хэлэлцэн, шийдвэрлэснийг дурдаад ажлын биелэлт 67 хувьтай болохыг онцлов. Түүн дотор Тавантолгойн орд, Төмөр замын бодлого, Шинэ бүтээн байгуулалт зэрэг далайцтай ажил өрнүүлэх томоохон төслийн шийдлийг гаргасан болохыг тэмдэглэсэн.

УИХ-ын хаврын чуулганыг өндөрлүүлсэнтэй холбогдуулж, Ардчилсан намын бүлгийн дарга Ч.Сайханбилэг, МАХН-ын бүлгийн дарга Д.Лүндээжанцан нар сэтгүүлчдэд мэдээлэл хийлээ.

Ардчилсан намын бүлгийн дарга хуралдааны эхэнд “Байнгын ажиллагаатай парламент байгуулагдсан 20 жилийн хугацаанд олонх, цөөнхийн бүлгийн дарга нар хамтдаа хурал зарлан, ажлаа тайлагнасан тохиолдол өнгөрсөн хугацаанд гараагүй бөгөөд өнөөдрийнх анхных болж байна” хэмээн тодотгосон юм.

Ч.Сайханбилэг гишүүн хэлэхдээ хаврын чуулганаар шийдвэрлэсэн асуудлууд нь цаг хугацаанд улам тодрох чухал шийдэл байсан гэлээ.

МАХН-ын бүлгийн дарга Д.Лүндээжанцан: “УИХ-ын хаврын чуулган маш их ачаалалтай ажиллаж, 130 орчим асуудлыг шийдвэрлэсэн байна. Эдгээр асуудлыг хэлэлцэн шийдвэрлэхэд хоёр намын бүлгийн санал нийлэхгүйгээс зарим үед амаргүй байсан. Бүлгүүд завсарлага авч байсан хэдий ч ажлын хэсэг байгуулан, улмаар нэгдсэн ойлголцолд хүрч, асуудлыг шийдвэрлэж ирсэн” гэлээ.