Монголын Бизнесийн Зөвлөл

Source: Onoodor                  Date: 29 July, 2010

Улсын ерөнхий прокурор Д.Дорлигжав АТГ-ын дарга Ч.Сангарагчааг албан тушаалаас нь түдгэлзүүлэх хүсэлтээ УИХ-д дахин гаргахаар болжээ. Тэрбээр энэ талаараа өчигдөр хэвлэлийнхэнд мэдээллээ. “Авлигын эсрэг хуулийн 22 дугаар зүйлд АТГ-ын удирдлагууд гэмт хэрэгт холбогдсон бол заавал бүрэн эрхийг нь түдгэлзүүлж шалгахаар заасан байдаг. Гэмт хэрэгт шалгуулж буй хүнтэй тохиролцоно гэсэн ойлголт байхгүй” гэжээ.

Мөн тэрээр: “Ч.Сангарагчаа шаардлагатай бичиг баримтыг нь гаргаж өгөхгүй байх, мөрдөн байцаагчийн дуудсан цагт нь очихгүй байх, компьютерийн хардыг нь сольж, цэвэрлэх гэх зэрэг саад учруулж байгаа юм билээ. Ч.Сангарагчаа Э.Амарбатыг бүхэл бүтэн 15 хоногийн турш Гүйцэтгэх ажлын тухай хууль зөрчиж тагнаж чагнасан. Мөрдөн байцаалтын явцад энэ ажлыг хийж байсан хүмүүс нь “Удирдлага үүрэг өгсний дагуу хийсэн” гэж тайлбарласан гэв.

Source: Montsame                      Date: 29 July, 2010

Гадаад харилцааны сайд Г.Занданшатар энэ сарын 22-23-нд БНСВУ-ын нийслэл Ханой хотноо болсон АСЕАН-ы Бүсийн чуулга-АРФ-ын сайд нарын 17 дугаар уулзалтанд оролцохдоо АНУ-ын Төрийн нарийн бичгийн дарга хатагтай Хиллари Клинтонтой уулзжээ.

Уулзалтын үеэр Г.Занданшатар сайд Монгол Улсын Ерөнхийлөгчийн АНУ-д хийх айлчлалыг хэрэгжүүлэх эрмэлзэлтэй байгааг нотолж, Монгол Улсын үндэсний эрх чөлөөний 100 жил, Ардын хувьсгалын 90 жилийн ой тус тус тохиох ирэх 2011 онд Төрийн нарийн бичгийн дарга хатагтай Хиллари Клинтоныг Монгол улсад айлчлахыг урьж, айлчлал хоёр талын болон бүс нутгийн хамтын ажиллагааг өргөжүүлэн хөгжүүлэхэд чухал ач холбогдолтой болохыг тэмдэглэсэн байна.

Source: Zuunii medee                    Date: 29 July, 2010

“Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай” хуулийг санаачлагч  УИХ-ын гишүүн Г.Баярсайхан хэлэхдээ: Улс төрийн нам сонгуульд оролцохдоо аль аль нь байгаль орчны чиглэлд шийдвэртэй алхам хийхээ амлаж гарч ирсэн. Хоёулангийнх нь мөрийн хөтөлбөрт алтны жижиг уурхайнуудыг цэгцлэх, ойн сан, усны сав газар ашигт малтмал олборлож байгаа газруудад хяналт тавих, шаардлагатай бол хаах хүртэл арга хэмжээ авахаар тусгасан. Харамсалтай нь үүнийг эсэргүүцэгчид бий” гэжээ.

Мөн тэрбээр: “манай орны маш олон нуур, цөөрөм, гол горхи ширгэж, зарим нь устаж үгүй болсон. Уул уурхай руу улайрсныхаа хариуд бид байгалиас гэсгээл амсч байгаа юм. Цаг хугацаа өнгөрөх тусам дэлхийн дулаарал, байгаль цаг уурын нөлөө бидний эсрэг чиглэж байгааг анхаарах учиртай. Хуурайшилтаас үүдэлтэй ойн түймэр, цөлжилтийн аюул их байна. Өнөөдөр хэдэн кг алтны төлөө байгалиа сүйтгэж болохгүй, эрүүлээр сэтгэж алсыг хармаар байна” гэв.

Source: Zuunii medee                  Date: 29 July, 2010

Орхон голын сав газар ашигт малтмал олборлож байгаа уул уурхайн компаниудын үйл ажиллагаанд дариу шалгалт хийж, зохих арга хэмжээ авах албан даалгаврыг БОАЖ-ын сайд холбогдох газруудад өгсөн билээ. Мэргэжлийн хяналтын ерөнхий газрын байгаль орчны сарын аяны хүрээнд 21 аймгийн нутагт олборлолт хийж буй уул уурхайн компаниудад хуулийн хэрэгжилтийн байдалд хийх шалгалт үргэлжилж байна.

МХЕГ-ын байгаль орчин, уул уурхайн хяналтын хэлтсийн дарга Д.Цэрэндаш Орхон голын сав газарт олборлолт хийж байгаа компаниуд 11 байгаа гэжээ. Энэ асуудал одоо бүх хэвлэл мэдээллийн хэрэгслийн анхааралд байгаа бөгөөд БОАЖЯ-наас нэг хүн мөн шалгалтын багт байгаа аж.

Энэ асуудлын тал дээр нэг сонирхолтой зүйл нь Монгол газар компани 11 аж ахуй нэгжийг өөрийнхөө талбай руу оруулсан байсан юм.